Pratisaṃvidavatāraparivartaḥ
Technical Details
pratisaṃvidavatāraparivartaḥ ||
tatra kumāra kathaṃ bodhisattvo mahāsattvo dharmapratisaṃvidi caran dharmeṣu dharmānupaśyī samudāgacchatyanuttarāyāṃ samyaksaṃbodhau ? iha kumāra bodhisattvo mahāsattvo dharmeṣu dharmānupaśyī nānyatra rūpeṇa bodhiṃ samanupaśyati | nānyatra rūpādvodhāya carati | nānyatra rūpeṇa bodhiṃ paryeṣate | nānyatra rūpeṇa bodhāya samudāgacchati | nānyatra rūpeṇa sattvāni bodhāya samādāpayati | nānyatra rūpeṇa tathāgataṃ paśyati | rūpasyāvināśasvabhāvaḥ tathāgata iti tathāgataṃ paśyati | anyad rūpamanyo rūpasvabhāva iti naivaṃ paśyati | anyo rūpasvabhāvo'nyastathāgata iti naivaṃ paśyati | yaśca rūpasvabhāvo yaśca tathāgata ityadvayeyaṃ dharmatā | evaṃ paśyan bodhisattvo mahāsattvaścarati dharmapratisaṃvidi | evaṃ nānyatra vedanāyā nānyatra saṃjñāyā nānyatra saṃskārebhyo nānyatra vijñānena bodhiṃ samanupaśyati | nānyatra vijñānādbodhāya carati | nānyatra vijñānena bodhiṃ paryeṣate | nānyatra vijñānena bodhāya samudāgacchati | nānyatra vijñānena sattvāni bodhāya samādāpayati | nānyatra vijñānena tathāgataṃ paśyati | vijñānasyāvināśasvabhāvastathāgata iti tathāgataṃ paśyati | anyadvijñānamanyo vijñānasvabhāva iti naivaṃ paśyati | anyo vijñānasvabhāvo'nyastathāgata iti naivaṃ paśyati | yaśca vijñānasvabhāvo yaśca tathāgata ityadvayeyaṃ dharmatā | evaṃ paśyan bodhisattvo mahāsattvaścarati dharmapratisaṃvidi ||
atha khalu bhagavāṃstasyāṃ velāyāmimā gāthā abhāṣata -
rūpeṇa darśitā bodhī bodhaye rūpa darśitam |
visabhāgena śabdena uttaro dharma deśitaḥ || 1 ||
śabdena uttaraṃ rūpaṃ gambhīraṃ ca svabhāvataḥ |
samaṃ rūpaṃ ca bodhiśca nānātvaṃ nāsya labhyate || 2 ||
yathā nirvāṇa gambhīraṃ śabdenāsaṃprakāśitam |
labhyate na ca nirvāṇaṃ sa ca śabdo na labhyate || 3 ||
śabdaścāpyatha nirvāṇamubhayaṃ tanna labhyate |
evaṃ śūnyeṣu dharmeṣu nirvāṇaṃ saṃprakāśitam || 4 ||
nirvāṇaṃ nirvṛtī vuttā nirvāṇaṃ ca na labhyate |
apravṛttyaiva dharmāṇāṃ yathā paścāttathā purā || 5 ||
sarvadharmāḥ svabhāvena nirvāṇasamasādṛśāḥ |
jñātā naiṣkramyasārehi ye yuktā buddhaśāsane || 6 ||
paśyitvā kāyu buddhasya vakṣyante dṛṣṭu nāyakaḥ |
na cāhaṃ rūpakāyena paśyituṃ śakya kenacit || 7 ||
jñātaḥ svabhāvo rūpasya yādṛśaṃ rūpalakṣaṇam |
rūpasvabhāvamājñāya kāyo mama nideśitaḥ || 8 ||
evaṃ pañcāna skandhānāṃ jñānaṃ me dharmalakṣaṇam |
jñātvā svabhāvaṃ dharmāṇāṃ dharmakāye pratiṣṭhitaḥ || 9 ||
deśemi dharma sattvānāṃ dharmakāye'pyaniḥsṛtaḥ |
na ca dharmata buddhānāṃ śakyaṃ vācāya bhāṣitum || 10 ||
imaṃ nayamajānanto buddhaśabdaṃ śruṇitva te |
ghoṣamātreṇa vakṣyanti dṛṣṭo me naranāyakaḥ || 11 ||
sarvasaṃjñāprahīṇasya bhavasaṃjñā vigacchati |
na jātu śabdasaṃjñasya bhavate śāstṛdarśanam || 12 ||
yaḥ śūnyatāṃ prajānāti īdṛśaṃ rūpalakṣaṇam |
na cānyā śūnyatā uktā anyā rūpasvabhāvatā |
yastu rūpaṃ prajānāti sa prajānāti śunyatām || 13 ||
yaḥ śūnyatāṃ prajānāti īdṛśaṃ rūpalakṣaṇam |
na cāsau mārakoṭībhirbhūyaḥ śakya parājitum || 14 ||
prajānāti hi yo rūpaṃ sa prajānāti śūnyatām |
ya śūnyatāṃ prajānāti sa prajānāti nirvṛtim || 15 ||
imāṃ gatimajānantaḥ pranaṣṭā aupalambhikāḥ |
abhāve bhāvasaṃjñeyo bhāve cābhāvasaṃjñinaḥ || 16 ||
vañcitā jñātralābhena pranaṣṭā mama śāsanāt |
phalasaṃjñā avasthāne riktāḥ śrāmaṇakāddhanāt || 17 ||
kusīdā hīnavīryāśca śīlaskandhe asaṃsthitāḥ |
paryupthitāśca vakṣyanti na etad buddhaśāsanam || 18 ||
kecidevaṃ pravakṣyanti vayaṃ bodhāya prasthitāḥ |
adāntā avinītāśca parasparamagauravāḥ || 19 ||
śabdakāmā bhaviṣyanti dharme caivānavasthitāḥ |
evaṃ sā bheṣyate icchā jñātralābhagaveṣaṇe || 20 ||
lābhakāmā bhaviṣyanti saṃnipāte hi cintakāḥ |
madapramādābhibhūtā lābhasatkāra arthikāḥ || 21 ||
niḥsṛtā lābhasatkāre jñātralābhagaveṣiṇaḥ |
stūpān vihārān kāhenti kulastrīṣvadhimūrcchitāḥ || 22 ||
niḥsṛtāścopalambhasmin kāmatṛṣṇāsu niḥsṛtāḥ |
gṛhikarma kariṣyanti mārasya viṣaye sthitāḥ || 23 ||
gṛhiṇāṃ deśayiṣyanti kāmā agniśikhopamāḥ |
praviśya ca gṛhāṃsteṣāṃ dūṣayiṣyanti tān kulān || 24 ||
gṛhiṇaśca bhaviṣyanti teṣu śāstārasaṃjñinaḥ |
teṣāṃ ca vipravustānāṃ putradārāṇi dūṣayi || 25 ||
ye teṣāmannapānena kariṣyanti anugraham |
teṣāṃ tatputradāreṣu bhāryāsaṃjñā bhaviṣyati || 26 ||
gṛhiṇo na svadāreṣu bhaviṣyantyadhimūrcchitāḥ |
yathā te pravrajitvā hi paradāreṣu mūrcchitāḥ || 27 ||
śikṣāvadātavastrāṇaṃ gṛhīṇaṃ yā mi darśitā |
sā śikṣā teṣāṃ bhikṣūṇāṃ tasmin kāle na bheṣyati || 28 ||
bherīśaṅkhamṛdaṅgehi pūjāṃ kāhenti te mama |
yā ca sā uttamā pūjā pratipattirna bheṣyati || 29 ||
te ātmanā suduḥśīlā dṛṣṭvā śīlapratiṣṭhitān |
anyonyamevaṃ vakṣyanti ete'pi yādṛśā vayam || 30 ||
śrutvā śīlasya te varṇaṃ duḥśīlāḥ pāpagocarāḥ |
paryutthitāśca vakṣyanti naivaitadbuddhabhāṣitam || 31 ||
na ca hrī bheṣyate teṣāṃ naṣṭaṃ śrāmaṇakaṃ dhanam |
coditābhūtavācāya buddhabodhiṃ pratikṣiti || 32 ||
teṣāṃ vyāpannacittānāmutsṛṣṭvā buddhaśāsanam |
dharmaṃ pratikṣipitvā ca vāso'vīcau bhaviṣyati || 33 ||
na me śrutaṃ ca dṛṣṭaṃ vā yeṣāmetādṛśī carī |
te buddhajñānaṃ lapsyante bāladharmapratiṣṭhitāḥ || 34 ||
yā teṣāṃ kuhanā tatra śāṭhiyaṃ vākkiyaṃ tadā |
jānāmi tadahaṃ sarvaṃ jñānaṃ me'tra pravartate || 35 ||
sacet kalpaṃ prabhāṣeyaṃ yatteṣāṃ skhalitaṃ pṛthu |
bodhisattvapratijñānāṃ kiṃcinmātraṃ prakīrtitam || 36 ||
nāsti pāpamakartavyaṃ kumārā teṣa bheṣyati |
mā tehi saṃstavaṃ sārdhaṃ kuryāstvaṃ kāli paścime || 37 ||
ālapet saṃlapeyyāsi kuryāsī teṣu gauravam |
anolīnaḥ satkareyyāsi agrabodhīya kāraṇāt || 38 ||
varṣāgraṃ paripṛcchitvā yaste vṛddhataro bhavet |
kuryā hi gauravaṃ tatra śirasā pādavandanam || 39 ||
na teṣāṃ skhalitaṃ paśyedvodhimaṇḍa vipaśyatām |
pratighātaṃ na janayet maitracittaḥ sadā bhavet || 40 ||
yadyeṣāṃ skhalitaṃ paśyeddoṣāṃsteṣāṃ na kīrtayet |
yādṛśaṃ kāhitī karma lapsyate tādṛśaṃ phalam || 41 ||
smitena mukhacandreṇa vṛddheṣu navakeṣu ca |
pūrvābhāṣī bhavennityaṃ hatamānaśca sūrataḥ || 42 ||
cīvaraiḥ piṇḍapātaiśca kuryāsteṣāmanugraham |
evaṃ cittaṃ pradadhyāstvaṃ sarve bheṣyanti nāyakāḥ || 43 ||
adhyeṣyeyuryadi tvāṃ te dharmadānasya kāraṇāt |
prathamaṃ vācaṃ bhāṣeyyā nāhaṃ vaipulyaśikṣitaḥ || 44 ||
evaṃ tvaṃ vāca bhāṣeyyā āyuṣmān vijña paṇḍitaḥ |
kathaṃ mahātmanāṃ śakyaṃ purato bhāṣituṃ mayā || 45 ||
sahasaiṣāṃ na jalpeta tulayitvā ca bhājanam |
yadi bhājanaṃ vijānīyā anadhīṣṭo'pi deśayet || 46 ||
yadi duḥśīla paśyesi pariṣāyāṃ bahusthitān |
saṃlekhaṃ mā prabhāṣestvāṃ varṇaṃ dānasya kīrtayeḥ || 47 ||
bhaveyuryadi vālpecchāḥ śuddhāḥ śīle pratiṣṭhitāḥ |
maitraṃ cittaṃ janitvā tvaṃ kuryāḥ saṃlekhikīṃ kathām || 48 ||
parīttā yadi pāpecchā śīlavanto bahū bhavet |
labdhapakṣastadā bhūtvā varṇaṃ śīlasya kīrtayet || 49 ||
pūrvaṃ pariṣadaṃ jñātvā yadi śuddhā bhavettadā |
yāvantaḥ kuśalā dharmāḥ sarvāṃstebhyaḥ prakāśayet || 50 ||
dānaṃ śīlaṃ tathā kṣāntiṃ vīryaṃ dhyānaṃ śrutaṃ tathā |
saṃtuṣṭyalpecchasaṃlekhān varṇayet kīrtayet sadā || 51 ||
araṇyavāsaṃ dhyānasukhaṃ gaṇavāsavivarjanam |
eteṣāṃ varṇa bhāṣeta evaṃ hi dhārayet sukham || 52 ||
araṇyavāsa no riñcenna śīlaparamo bhavet |
pratisaṃlānu seveta na dānaparamo bhavet || 53 ||
śīlaskandhe sthihitvā ca bāhuśrutyamupārjayet |
imaṃ samādhimeṣantaḥ pūjayecchāstṛdhātavaḥ || 54 ||
chatrairdhvajaiḥ patākābhirgandhamālyavilepanaiḥ |
kārayet pūja buddhasya samādhiṃ śāntameṣatā || 55 ||
rañjanīyehi tūryehi saṃgītiṃ saṃprayojayet |
pūjayeddhātuṃ buddhasya anolīno atandritaḥ || 56 ||
yāvanti gandhamālyāni dhūpanaṃ cūrṇa cailikam |
sarvaistaiḥ pūjayennāthaṃ buddhajñānasya kāraṇāt || 57 ||
yāvatī kācit pūjāsti aprameyā acintiyā |
kuryāstāḥ sarvabuddhānāṃ samādhiṃ śāntameṣatāḥ || 58 ||
pratyaṃśaṃ sarvasattvebhyaḥ samaṃ dadyādaniśritaḥ |
asaṅgajñānameṣanto buddhajñānamanuttaram || 59 ||
mayāpi pūrvabuddhānāṃ kṛtā pūjā acintiyā |
aniśritena bhūtvainaṃ samādhiṃ śāntameṣatā || 60 ||
durlabhotpādu buddhānāṃ durlabho mānuṣo bhavaḥ |
durlabhā śāsane śraddhā pravrajyā upasaṃpadā || 61 ||
yena ārāgitaḥ śāstā cittaṃ bodhāya nāmitam |
mā cala tvaṃ pratijñāyāstiṣṭha ca pratipattiṣu || 62 ||
ya idaṃ dhārayet sūtraṃ kṣayakāle upasthite |
pratibhānaṃ labhet kṣipraṃ pravṛttaṃ yadi dhārayet || 63 ||
ekagāthāṃ pi dhāritvā puṇyaskandho acintiyaḥ |
kiṃ vā punaḥ sarvasūtraṃ dhārayed yaḥ śrutārthikaḥ || 64 ||
sarvasattvān bodhiprāptān pūjayed yo hyatandritaḥ |
yaḥ kuryād gauraveṇāsau kalpasattvopamān sadā || 65 ||
itaḥ samādhito yaśca gāthāmekāṃ pi dhārayet |
sarvaṃ purimakaṃ puṇyaṃ kalāṃ nopaiti ṣoḍaśīm || 66 ||
acintiyānānuśaṃsān buddhajñānena jānami |
imaṃ samādhiṃ śrutveha yaḥ kāṅkṣāṃ na kariṣyati || 67 ||
iti śrīsamādhirāje pratisaṃvidavatāraparivarto nāma caturviṃśatitamaḥ ||